عائشة الماجدي تكتب ✍️
◾️تخبط الحكومة —
واضح إنو وزارة النفط شغالة بالبركة ساي وحل صفوف اليوم بكرة الله كريم وهكذا …
◾️بتاريخ 11 / يونيو الوزارة نادت الشركات قٌرابة 45 شركة نفط خاص وعام وفي الاجتماع تبنوا الشراكة الذكية دون إستثناء اي طرف واعلنت سياسات جديدة لعمليات الاستيراد بطرح عطاءات داخلية وإلغاء الاستيراد عبر المجموعات .
◾️بعدها سعادة الفريق ابراهيم جابر اخد تنوير كامل حول الأزمة الراهنة في اجتماع شامل …
◾️و بتاريخ 12/ يونيو مجلس الوزراء أعلن عن دخول الحكومة في عملية الإستيراد ..
◾️في تخبط واضح بشرح ليك تعدد مراكز القرار او بالأحرى فشل لوزارة الطاقة في حل الأزمة الحالية ويبدو أن مجلس الوزراء شاف الوزارة ( غرقانة قالوا خلاص نحن نشوت الكورة قون ونستلم ) ..
◾️لكن المتابع لهذه الأزمة ببساطة يفهم ان الخروج من الخنقة دي يعتمد على عملية خروج الحكومة من السوق وتحرير السوق للمشتقات البترولية ووسّع دائرة المنافسة بوفرة البضاعة المعروضة في السوق تلقائياً الاسعار بتنخفض والمواطن برتاح وبتنعكس على الحياة العامة…
◾️لكن هناك اسئلة فلنفترض الحكومة دخلت السوق وتلقائياً أظن ان الحكومة ف السوق هسي ( شركات النيل وقادرة وبشائر ) مش دي تابعة للحكومة ولا ما ( صحي ) طيب تاني تدخل كيف الحكومة دي ؟
◾️المهم قول يا عزيزي شركات الحكومة دخلت وقلنا عشان تضمن ( السيطرة وتتحكم في السعر وضمان الامداد ) لكن هل الحكومة عندها خبرة تجار الشركات الخاصة في التفاوض والتوفير السريع والشراء بأقل سعر من الخارج بتلفون بس !
من الله خلقنا لقينا الحكومة بطيئة وإجراءاتها معقدة وعقيمة وبتحتاج وقت عشان تنجز ملف شئ مراسلات وشئ موافقات وايييك جرجرة ( وانت وضعك في السودان استثنائي ) وفي النهاية الحكومة غالباً بتشتري بالغالي عشان ما زي التجار بعرفوا محل الموردين وشغل تحت الترابيز في الخارج وهكذا ؟
◾️طيب افتراضاً لو الحكومة دعمت السعر وما حررت السوق ح تدفع الفرق من وين طبعاً من خزينة الدولة ( والخزينة اعتقد فاضية ) ومفلسة البلد حالياً مافيها عائد صادر اظن ولا كيف يا دكتور جبريل ابراهيم …
◾️غايتو المعروف ان الحكومة نفسها طويل لو حصل عطل في باخرة ساي او مشكلة في الميناء عااااادي تقعد بالشهور لحدي ما يحلو المشكلة يكون الهواء ضربنا ونمشي لمقولة الأزمة مكانها وين وعندنا تجارب حكومات كثيرة بواخر تقيف شهور …
◾️أنا في رأيي واعتقد النموذج الناجح الحكومة تنظم وتضبط السوق والقطاع الخاص يشتري ويوزع وينافس في سوق حر ….. مالها ومال الاحتكار …
◾️غايتو كان الحكومة بقت جادة ودخلت السوق تاني اي ازمة وقود الشعب حيكون هو والحكومة رأس مباشر ودي قصة مخيفة فيها بكون غضب شعبي ومعروف نهايته زمان لما يكون في منافس مثلاً شركات خاصة الشعب بحمل الشركات المسؤولية وبثور ضدها ويشتمها وبلعن يومها زاتو …
◾️الخلاصة في أسئلة مهمة يا سادة ؟
من يتحكم في تصاديق الاستيراد بعدين ؟
والعقودات بتتم كيف ؟
الشفافية سمحة ولا كيف ؟
◾️واخيراً
اقيلوا وزير النفط والوكيل ومدير مكتبهم !
وبس
