بعد قرارات الوزير برجوع الجامعات من الخارج وفي عز الوضع الحالى ده يبقى في سؤال مشروع —
◾️البلد وضعها كيف؟
لسه البيوت مدمرة والناس شغالة صيانة بتلقط في قروشها زي دم الحجامة وناس لسه نازحة في المدارس لا شغل لا مصادر دخل غالبية الشباب من غير عمل عاطل الأسرة بتفتش اللقمة قبل الكراس.
كهرباء قاطعة بالـ20 ساعة وموية ما بتجي أمراض منتشرة وخريف على الأبواب وتظهر الكوليرا والملاريا عشان الحٌفر والتلوث البيئي هناك أساتذة مشردين ورواتب تعبانة ما بتغطي المنصرفات …
◾️وبعد ده كلو السيد وزير التعليم العالي مُصر يرجّع الجامعات لمقارها الرئيسية!
◾️للحقيقة في وجهة نظري دا قرار غير مدروس ليه؟
لان الجامعة ما حيطة وفصول بس العملية التعليمية محتاجة استقرار كهرباء عشان المعامل تشتغل وانترنت عشان البحوث و مواصلات عشان الطالب يصل الجامعة وموية عشان يقعد يشرب ويصلى و دي كلها فيها صعوبات حتدرّس كيف؟
◾️طيب سيبك من الطالب وين الأستاذ ؟
ياخ استاذ او دكتور الجامعة ده بني آدم سوداني اثرت عليه الحرب أصبح نازح بيته اتنهب وانسرق نسبة للظروف ربما ما قبض راتب بكون من فترة ولو قبض راتب قليل يرجع يدرّس طلبة كيف وهو ما لاقي يأكل أولاده ومهوم وما عارف يعمل شنو ؟
◾️والطالب ده زاتو إما نازح او لأجي إما فقد أبوه في الحرب إما شغال طلبه عشان يعيش أسرته تقول ليهو تعال ادفع رسوم ومواصلات وفطور؟ من وين يجيب ليكم القروش البتغطي احتاجاته دي ؟
◾️بعدين ياخ وين مراكز التدريب؟:
طب هندسة مختبرات كلها اتنهبت واتدمرت حتدرب الطلاب على شنو؟ على الخراب؟
◾️الخلاصة: العوامل التعليمية ما مباني فقط
التعليم بيعني أستاذ مستقر وطالب آمن وأسرة عندها دخل وكهرباء وموية ونت ومراكز بحوث ومعامل شغالة.
تشيل المبنى بس وتخلي الباقي ده اسمو شو إعلامي ساي ما تعليم يا سيد الوزير الهٌمام ده تدمير لما تبقى من التعليم.
◾️المطلوب:
تأجيل عودة الجامعات للخرطوم والمناطق غير المستقرة لحد ما الحد الأدنى من مقومات الحياة يتوفر للطلبة ديل
استمرار التعليم أونلاين ومن المراكز الآمنة في الولايات لإنقاذ السنين الدراسية.
◾️ حل مشكلة الأساتذة أولاً: —
رواتبهم وسكنهم واستقرارهم يعني تهيئة البيئة مهمة جداً ..
ما تستخدموا الطلاب ورقة سياسية عشان تقولوا ( الحياة رجعت طبيعية ) وتمشوا الامور عشان فجاة ح تكشفوا ضهر الحكومة دي والناس بتكتشف الأوضاع
رجعوا مقومات الحياة والأساسيات للتعليم اول بعدها الجامعات بترجع بمشيئة الرحمن …
◾️أستخير يا السيد الوزير قبل ما تنفذ قرارك دا
عائشة الماجدي
