وعي

مخطط التقسيم: يُنفذ بذكاءهم وبغبائنا إذا لم نتدارك الأمر —-

فكرة الانفصال والتقسيم للسودان عند العالم الخارجي ماشي بخطة شيطانية مدروسة الطرف العايز يقسم السودان بيلبس وش المشفق على البلد علناً يصرخ: بخبث ( لا تفاوض ) الحرب موت بس اجتثوا العدو وينتهي من دم اولادنا العٌزاز وهو نفس الطرف الخبيث سراً يمد الطرف الثاني المليشي بالسلاح والمال والمعلومات والدعم اللوجستي وطيران ينزل في مطار نيالا والدول المجاورة ويفتح ليهو خطوط مع دول جاهزة تعترف بيهو بكرة…

اللعبة واضحة: يصوروا الطرف التاني المليشي كداعية سلام ووحدة ويصورونا كجياشة وداعمين ومساندين للجيش رافضين للحوار و بعدها يوصلوا الناس لمرحلة الخيارات ويخلوا الانفصال يظهر كخيار للمواطن كأنه الحل الأرحم من الحرب….
نحن نبارك خطاوي القائد العام البرهان للحوار والترحيب بالسلام حتى لا تٌمرر الكرة خلفنا وتحرز هدف للاعداء في الحقيقة ح نكون موهومين لو فاكرين التقسيم حيقيف في الجنوب أو دارفور الحسابات الدولية المعادية أخبث من كده ..

الخطة :- سودان مفتت لدويلات متحاربة بعد ما نفشل في إدارته كدولة واحدة….
عشان كدا مفروض دربنا يكون درب الحوار تبع الرئيس البرهان ودا قطعاً ما بعني ايقاف العمليات العسكرية ( كلهم يمشوا مع بعض حوار وعمليات عسكرية ) …
لو ما كنا واعيين بكرة دارفور بعدها كردفان بعد شوية ح يختلف عبدالعزيز الحلو مع حميرتي ويلاقي الحلو نفس الدعم اللقاهو قرنق وحميدتي ويفصل جنوب كردفان والساقية لسه ح تكون مدورة ..
بالمناسبة دا ما سيناريو خيال دي خطوات بتتنفذ من الخارج بمعاونة اولادنا العاقين مننا بذكاء منهم وبغباء مننا …

وبس

عائشة الماجدي