أقيلوا وزير الطاقة —

◾️الخرطوم عاصمة البلد غرقانة في الظلام والمواطن دافع تمن الفشل من جيبه ومن أعصابه امام عينه كبير سن يضيق نفسه من امراض مزمنة وهو عاجز عن التخفيف عليه لعدم وجود الكهرباء أطفال تبكي من السخانة والكتمة صداع وحمي متواصل …

◾️لذلك اقالة وزير الطاقة واجبة ولو سألتني ليه ح اقوليك ؟

الكهرباء دي ما رفاهية :- في مستشفيات بتقيف مصانع بتقفل ودي معناها مافي إعمار وفي طلبة ما قادرين يقروا وبرضو الموية ما بتترفع يبقى وزير طاقة ما قادر يوفر أبسط حق يقعد ليه؟

وهي في الغالب أزمة إدارة ما أزمة موارد: السودان فيهو شمس ونيل وبترول وسدود وبستورد برضو العيب ما في البلد العيب في المسؤول البيدير عدم نجاح في الصيانة فشل في التخطيط فشل في المحاسبة وكلمة ياخ المواطن تعب ..

◾️بعدين لاحظت ان هناك جملة من الوعود كل شهر نسمع القطوعات حتقيف في برمجة جديدة في حلول جذرية النتيجة أسوأ المسؤول الما بحس بأوجاع الناس وقلبه على شعبه ما يستاهل

◾️لذلك يا سادة الطاقة عصب الدولة وزير ما نجح في الطاقة = دولة مشلولة ومافي انتاج ولا إنتاجية ومافي مواطن بعافية زاتو لو في مسمار نص للاقتصاد فهو ( الكهرباء ) ومسمارنا ده مصدي ومتآكل …

المطلب واضح:
إقالة وزير الطاقة فوراً + تعيين كفاءة فنية ما محاصصة حزبية….

ما عايزين وزير شكليات وشلليات عايزين وزير
( تولّع النور ) والماكينات تدور بس ..

الشعب ما عايز وعود عايز كهرباء

اقيلوا الوزير كفاية ✌️

عائشة الماجدي