البيتاجرو بالطاقة الشمسية الأيام دي في السودان ديل ياتهم شباب ؟ أفيدوني بالله كان عرفتوهم ديل منو —-

غايتو في الغالب والغالبية المتوقعة ( البعض منهم ) ديل الناس الاستغلوا ضلام البلد عشان يولّعوا جيوبهم لا غير ..

بتوقع انو تاجر الأزمات حاله يكون كالاتي وهو مبسوط الكهرباء قاطعة 20 ساعة متواصلة الموية واقفة المراوح ساكتة وطبعاً مكيفات دي سكنتها العنكبوت يجيك واحد تاجر مغضوب عليه يمشي يشتري اللوح ( بـ100 دولار ) يبيعو ليك ( بـ400 ) البطارية أم ( 150 ) يبيعها ( بـ600 ) تفتح خشمك يقول ليك سوق حٌر وهو في الحقيقة سوق استغلال وتجارة ازمات وعدم ضمير مننا كسودانيين في بعضنا بس …

◾️وفي كمان مجموعة كدا الإجرام ظاهر في وشهم ديل ناس الشهادات المضروبة يجيب ليك لوح مضروب يقول ليك على الطلاق دا ألماني وبطارية تعبانة يقول ليك ( حرّم ) ليثيوم عمرها 10 سنين بعد شهرين تموت وتلحق ( الرقدوا ) وتلفونه يقفل وتاني ما تلم فيه يعني زاتو ضمان مافي…

◾️وفي عينة تاني ديل الشفشافة سماسرة الفزع يخش قروبات الواتساب ويكتب ليك ( الحق العرض قبل ما يخلص الكمية محدودة ) بذكروني اخونا ابو رهف ( شيرو شيرو ) المهم يلعب على خوفك من السخانة ومرض العيال ووجع الناس الكبار وبكاء الحناكيش يبيع ليك الوهم قبل الطاقة يشتغل معاك شغل تنمية بشرية ..

◾️وفي مجموعة اوووووبا ديل القطط السمان ( المحتكرين الكبار ) يتحكموا في السعر الدولار زاد جنيه واحد هم يزيدوا المنظومة ألف دولار حجتهم الشحن والله الجمارك غالية جبريل زاد الدولار والمخاطر كلها يردموها على المواطن المسكين الغلبان دا …

◾️والنتيجة؟
المواطن الموجوع داير ينجض من السخانة والصداع يقوموا ينجضوهو في السعر ( بل بس )
عايز يهرب من ظلم الحكومة يقع في جشع التاجر

◾️غايتو رايي للحكومة افتحوا الاستيراد وصفّرو الجمارك على الطاقة الشمسية راقب السوق ما ممكن تحارب المواطن في الكهرباء الحكومية وتخليهو فريسة لتجار الخاص والقطط السمان ..

◾️رسالة لتاجر الأزمة:

اتقوا الله فينا كشعب بنجض من كل الاتجاهات ..

أقيلوا وزير الطاقة وبالمرة شيلوا معاه ناس مكتبه كلهم يمكن التقارير ما برفعوها ليه ولا ما بعرفوا الحاصل ف البلد يا حليلهم ….

الله في

عائشة الماجدي