عائشة الماجدي تكتب ✍️
الحرب الاقتصادية خنق الأنظمة بالاقتصاد …
◾️ما يحدث الآن في السودان يشبه إلى حد كبير ما حدث في سوريا ايام بشار الأسد الاخيرة وأوجه التشابه كتيرة وفي مقدمتها :-
▪️إنهيار العملة : في سوريا الليرة فقدت قٌرابة 99% من قيمتها خلال الحرب وفي السودان الجنيه وصل مراحل انهيار كبيرة برضو في هذه الايام والدولار طار النتيجة واحدة : القوة الشرائية للمواطن بتتبخر…
▪️تدمير سلاسل الإمداد: زمان في سوريا انضربت الأفران ومحطات الوقود والمستودعات هنا في السودان الحرب دمرت مصفاة الجيلي بنسبة كبيرة وأصبحت هجليج في يد مليشيا الدعامة و ضٌربت خطوط النقل والنتيجة كانت واضحة شح في الوقود وتحانيس بين وزير مجلس الوزراء وبين وزير الطاقة والشركات الخاصة يوم يتفقوا يوفروا وقود في الطلمبات ويوم يتحارنوا يجففوا السوق وفي النٌص ضايع المواطن حتى و لو القروش في….
▪️سلاح الرواتب والسيولة: تأخير المرتبات وقلة قيمة المرتب فيما يقابل السوق وشح الكاش بخلي الدولة عاجزة تدير نفسها والمواطن يفقد الثقة فيها و دا حصل في سوريا وبيحصل هسي في السودان …
▪️الجنود الحارسين في سوريا كانوا في فصائل بتحمي طرق التهريب والسوق السوداء وبتستفيد من الأزمة هنا في السودان الناس بتشير لمجموعات ومليشيات عندها مصلحة في استمرار أزمة الوقود والدولار لأنها بتكسب من السوق الموازي….
◾️لكن في فروقات مهمة برضو:
▪️الفاعل الخارجي: في سوريا كان في عقوبات أمريكية وأوروبية مباشرة خنقت الاقتصاد عمداً في السودان الوضع مختلف العقوبات أقل وأغلب الانهيار سببه الحرب الداخلية وتعطل الإنتاج والقطط السمان وبعض ولادة وبِطان السودان العاقين البستفيدوا من وضع الحرب وحالة اللادولة دا مثلاً شركات وقود خاصة تتدلع وتدلل على كيفها في اي وقت ممكن تجر ( فرملة اليد ) كان زعلوها …
▪️الهدف: في سوريا كان في شبه إجماع دولي تقريباً على إضعاف النظام في السودان المشهد معقد وفي دول كتيرة ما عندها مصلحة في انهيار الدولة السودانية لأنو بيعمل فوضى في كل الإقليم وفي جيران برضوا انهيار السودان ح يعمل مشاكل عندهم …لكن السودان بنهار بفعل اولاده براهم …
◾️الخلاصة
فكرة ( التجويع لحدي السقوط ) استراتيجية قديمة ومعروفة بتشتغل لما المواطن يصل مرحلة يقول ( أي وضع أحسن من دا ) ما عندنا مشكلة فيفقد النظام شرعيته من الشارع ويظهروا ناس من وين ما معروفين يعذبوا المواطنيين مجدداً …
▪️لكن استخدام ( كرت التجويع ) التاريخ بيقول إنه سلاح ذو حدين:
مرات بتسقط النظام زي ما بقولوا …
ومرات بتقوي النظام لأنو بيستخدم نظرية المؤامراة ويقول للناس ( شايفين العدوان الخارجي عايز يفترق البلد ) فيلمهم حولوا ويقعدوا في المرمطة لحدي ما تبقي سياسة امر واقع ….
دائماً الحرب الاقتصادية بتراهن على ان ( المواطن يستسلم ) ….
وبس
