خطورة

امتحانات الشهادة السودانية في دارفور بتعني ان ( مسمار النص بيتحرك ) يا السيد / الريس البرهان ويا كامل ود إدريس —-

تابعت في الاخبار ان مليشيا الجنجا أعلنت امتحانات الشهادة السودانية يوم 7 الجاي في الشهر دا وقطعاً دا ما خبر عادي
دي خطوة سياسية خطيرة من مليش’يا الدعم السريع وعندهم أهداف من قيام الامتحانات دي في دارفور—

اولاً بحاولوا يرسلوا رسالة رمزية للعالم الخارجي ولينا والمعروف ان الشهادة السودانية آخر حاجة موحدة في البلد وبتمثل مسمار النٌص عديل كدا وحكاية شهادة ( موازية ) من دارفور معناها فكرة إعلان للمليشيا ان عندهم ( دولة ) بيبنوا واقع إداري على الأرض.

ثانياً شرعنة المليشيا:

دايرين يتحولوا من مليشيا لـسلطة أمر واقع تعليم و شرطة وقضاء والامتحانات تديهم شرعية عند الأهالي وورقة تفاوض برة بفكرة ( نحن بندير إقليم كامل )

ثالثاً التقسيم الناعم:

الليلة امتحانات بكرة منهج براهو جامعات براهاعملة وجواز تشكيل لبنات دولة كاملة قدام عيونا كل ما الناس اتعودت تاخد خدماتها منهم مات السودان الواحد الموحد ..

الحل المطلوب من الدولة هسي قبل فوات الأوان:

◾️ان تنشر بيان عاجل ان أي شهادة خارج إشراف الوزارة الاتحادية لاغية وغير معترف بيها محلياً ودولياً…
◾️توفير بديل فوري: –
افتحوا مراكز طوارئ آمنة للطلاب مع ترحيل وسكن مجاني اسحبوا حجة ( أنقذنا مستقبل الأولاد ) ..

◾️انهاء الازدواجية: –
قٌدرت الملي’شيا على تنظيم امتحانات بتعني سيطرة كاملة لها إذا
بقاء سلطتين هو هدية للتقسيم يبقي هنا قدامنا واحد في الاتنين
يا حل عسكري الجيش والقوات المساندة يحرروا دارفور يا البلد دي بتروح والشمس فوق وكلنا نعاين بس ..

الخلاصة: في يد الريس البرهان مفروض يحسم الأمر دا طبعاً ( كامل ود ادريس دا ما عايزين نشغله مشغول شديد 😎 )
لذلك يا السيد البرهان
تجاهل امر الشهادة السودانية بيعني للخارج الاعتراف بيهم.

لذلك ( مسمار النص ) لو اتفكا الخيمة كلها بتقع.
السؤال للبرهان: الخطة شنو قبل يوم 7 يوم امتحانات الشهادة المٌعلن عنها للمليشيا ؟

السودان_واحد # الشهادة السودانية خط احمر

عائشة الماجدي