عائشة الماجدي تكتب ✍️
( معسكرات اللاجئين الخارجية… الوجع المنسي ) ….
▪️أكثر ما يؤلم هو صرف النظر عن معسكرات اللاجئين السودانيين في ليبيا وفي تشاد و إثيوبيا وكينيا و أفريقيا الوسطى و ديل أكتر من 4 مليون سوداني برة قاعدين في خيام من 2023 ونحنا هنا بنتناقش في دولار نزل وطار !!
ماهو ما ممكن يكون وضع بعض السودانيين اللآجئين اسوأ من السئ ونتجاهل ذلك ونمسك في حبل ميت إقالة وزير …
◾️الوضع في معسكرات اللاجئين الخارجية مؤلم وحكومتنا لم تٌحرك ساكن اهلنا يتعرضوا في ليبيا للذلة والإهانة وكامل ادريس يسافر لندن وغيرها والإعيسر يتحدث عن الآثار ووزير الخارجية رامي طوبتهم لكن دعوني أضرب لكم بعض الأمثلة من الوجع ..
◾️ليبيا الكفرة اللاجئين فيها وضعهم مٌزري جداً لا قادرين يعيشوا في وسط الذٌل والعنصرية ولا عارفين يتوجهوا لمنو يشكوا لهم حالهم ولا عارفين مصيرهم شنو ولا موجودة عودة طوعية عشان يرجعوا ولا في حكومة جايبة خبرهم سفارتنا في ليبيا صمت القبور وكأنوا هؤلاء ليس منهم او من ضمن عملهم كسفارة ..
◾️تشاد – أدري وأبشي: تقريباً فوق المليون لآجي والخريف دخل والخيام ح تغرق الأمراض حتنتشر كوليرا و سوء تغذية و أطفال حـيموتوا بالملاريا عشان مافي خيمة طبية مٌجهزة ..
◾️جنوب السودان الرنك : يٌقال ان هناك ما يٌقارب 300 ألف عالقين لا أكل لا دواء المنظمات وقفت الدعم لأنو التمويل نقص ..
◾️ إثيوبيا : بعض الناس محبوسة بين المليشيات الإثيوبية والبعض الآخر لا قادرين يرجعوا لا قادرين يدخلوا أديس …
◾️ العامل المشترك بين اللآجئين السودانيين في كل الدول كلهم هو ( الإهمال ) ببساطة الحكومة السودانية ما شايفاهم سفاراتنا هناك لو سألتها في الغالب ح تقول ليك ( ما عندها تعليمات ) المواطن بقى لاجئ من بلدو وغريب في بلاد الناس ومٌهان وانت منتظر تعليمات !
◾️ عشان كدا إقالة مسؤول او انتظاره يحل عوج ما بتحل مشكلة معسكرات الخارج لانو المشكلة ما في السفير ولا في مندوب اللاجئين المشكلة في تلاثة سيستمات ضاربة:
◾️اولاً المشاكل البتواجه اللاجئ في السفارة الخارجية مثلاً
▪️جوازك منتهي !
▪️يا اخونا استنى 8 شهور !
▪️ دايرين وثيقة يا ولدنا !!
لذلك اللآجئين مافي حصر مافي قاعدة بيانات مافي زول عارف الناس ديل منو ووين كيف تساعد زول ما شايفو ودا طبعاً تقصير من وزارة الخارجية والداخلية ومن الحكومة كلها ..
الإغاثة مفوضية العون الإنساني اعتقد شغالة (داخلي بس ) اللاجئ البرة دا ما محسوب مواطن لذلك مفروض نضع حلول لحل مشاكل اللاجئين!
◾️ الحلول —
- نعمل غرفة عمليات العودة الطوعية والكرامة
- يطلع قرار نافذ: ملف اللاجئين يتسحب من 6 وزارات ويبقى عند ( غرفة ) واحدة فيها ممثل السيادي + الخارجية + الداخلية + المالية + الهلال الأحمر.
-صلاحية الغرفة دي تطلع جواز وتصدق تذكرة وتحول قروش وتفتح معبر في 24 ساعة. - المقر: ما يكون في الخرطوم المقر يبقى في أرقين و أدري ومنفذ في ليبيا القيادة في السفارات تنزل تتابع الحاصل بالمناسبة
( ناسنا في السفارات مرتبهم بالدولار والواحد لما فترته تنتهي بزعل عشان بفقد مرتب الدولار ) !!!! - الميزانية تمشي مع القرار
- صندوق سيادي او تكافلي …
- الصرف: أي لاجئ داير يرجع تذكرته يسلموها ليه في ايده …
- نعلق بإحترافية وشغل من غير مأكلة
( سبورة اللاجئين ) في كل معبر وسفارة:
المعسكر و العدد الرجعوا الشهر دا
ونشوف الوفيات بالمرض عددهم كم !!
كم ضربات سريعة ممكن تتعمل في أسبوع:
-قوافل التوثيق: 10 عربات من السجل المدني والجوازات تمشي أدري وأسوان لكن ( خوفي الاختطاف يحصل زي الفاتوا المخطوفين ) المهم تطلع جوازات ووثائق في الخيمة تاني مافي زول “فاقد هوية”.
-تذكرة الخرطوم بجنيه رمزي: اتفاق مع بصات ( العزيزية ) او ( أبو عامر ) الحكومة تدفع 80% والمواطن 20% البص يتحرك فاضي ما يرجع فاضي.
-عيادة السودان المتنقلة: كل معسكر كبير تنزل فيهو خيمة طبية سودانية. دكتور + صيدلية + طوارئ. بدل ما أهلنا يشحدوا العلاج من الخواجات.
أدوا السودانيين احساس انهم سودانيين وعندهم حكومة مسؤولة منهم …
◾️الخلاصة:
المعسكرات الخارجية دي امتحان رجولة للدولة لو ما قدرنا نستر 4 مليون برة كيف حنستر 40 مليون في الداخل…
( وزارة الخارجية خليك صاحية )
وبس
