◾️نموذج ولاية الجزيرة —
أهل الجزيرة كتبوا سطر مهم في كتاب الحرب دي الحصل في الجزيرة كان نموذج مختلف:
▪️الاستنفار الشعبي: لما المليشيا دخلت مدني والقرى الناس ما انتظرت الجيش الشباب والكبار وحتى النساء طلعوا بالعكاز والسكين والكلاش المتوفر مقاومة شعبية واضحة وكانت أخطر على أي قوة مهاجمة من الجيوش النظامية لأنو العدو ما عارف الضربة جاية من وين.
سند الجيش: أهل الجزيرة ما خلو الجيش براهو فتحوا صدورهم عارية لمواجهة المليشيا ولحماية عرضهم وأرضهم وقفوا معاهم وقدموا ( دم بدم وفقد بفقد واصابة بإصابة ) وفتحوا بيوتهم أكلوا الجنود ووصفوا ليهم الدروب بالتٌرع والكنار والقناطر ودلوهم على المتعاونين يعني المعركة كانت ( جيش + شعب ) ودي المعادلة البتقلب الموازين.
◾️ التحرير بالرجالة:
الجزيرة رجالة وحٌمرة عين اتحررت قرية قرية وبيت بيت الناس قدمت شهداء كتار ودفعت تمن غالي ود النورة والسريحة نموذج للتضحيات اصبحت أرض شهداء لكن النتيجة إنو الولاية اللي كانت سلة غذاء السودان رجعت والموسم الزراعي بدا يتعافى.
▪️الدرس الطلعنا بيهو: الملي’شيا بتقدر تحتل الأرض لكن ما بتقدر تحتل الناس طالما في إستنفار وأهل الجزيرة أثبتوا إنو الإرادة أقوى من السلا’ح.
وولاية الجزيرة قدمت نموذج ياريت بقية الولايات تكون مثلها …
الرحمة والمغفرة لشهداء الجزيرة والشفاء للجرحى
والتحية لكل أم وأب وبت وولد شال عكازو وقال البلد دي حقتنا
أهل الجزيرة رفعوا راس كل السودان….
حياكم الله جميعاً
عائشة الماجدي
