عائشة الماجدي
( القبة تحتها مافي فكي ) …
◾️ الأزمة الحالية ابداً ما أزمة أشخاص الأزمة أزمة سيستم كامل وعليه لا أتوقع تغيير في حكومة دولة رئيس الوزراء كامل ادريس حالياً…
▪️وفي ظل الوضع الحالي إقالة المسؤول ما بتحل حاجة ؟
▪️المشكلة في السيستم والمؤوسسية لو جبت مٌعلم يسوق ليك عربية اللستك مبنشر ومافيها بنزين حيقيف في محله الوزارات هسي شغالة بدون ميزانية كبيرة وواضحة واعتقد بدون صلاحيات كاملة وبدون تنسيق مشترك لذلك الوزير الجديد مثلاً حيجي يلقى نفس المكتب الفاضي ونفس الأدراج المليانة ورق ويدخل ويمرق لحدي ما يقيلوه ..
لذلك المواطن ما فارق معاهو اسم الوزير منه فارق معاهو الموية جات؟ الدواء رخص؟ السوق انضبط ؟ لو الوزير اتغير 10 مرات والمواطن ما حسّ
بالأثر يبقى ما عملنا حاجة…
بعدين لازم الحكومة تعمل بمبدأ ( ما تريسوا وتتيسوا ) والجملة دي براها دستور الترجمة للمثل يعني ما تبقوا رؤساء في المكاتب وتيوس في الميدان ما تبقى قرارك في يد غيرك ( كمل يمينك ) …
يعني ما ينفع تكون لابس بدلة وبتوقع قرارات من برج عاجي وإنت ما عارف التنكر بتاع الموية في الأبيض واقف وين القيادة هسي محتاجة ( تيوس ) جبال تنزل الميدان ما ( رؤساء ) قاعدين في الاجتماعات والقرار مافي يدك ماشي امعة ساي …
▪️طيب الحل شنو بدل لعبة الكراسي دي ؟
لو دايرين تغيير حقيقي يحس بيهو المواطن لازم تلاث حاجات تتحسم:
▪️غرفة عمليات واحدة بقرار نافذ
ما ممكن أي أزمة يكون عندها 7 جهات تشيل الورق تحوم على سبعة مسؤولين واي واحد فيهم وراهو جيش جرار عشان تدخل ليه …
▪️الميزانية تمشي مع القرار
الوزير بقول ح نحل مشكلة الموية طيب القروش وين؟
أي قرار ما معاهو بند صرف واضح دا كلام جرايد ساي القروش المفروض تطلع من المالية مباشرة لغرفة العمليات بدون لفة بالشهور الطِوال !
▪️المحاسبة بالمتر
ما تحاسب الوزير عشان هو كعب ولا كويس حاسبو بالأرقام:
▪️قلت حتنزل سعر الدقيق 20% نزل ولا ما نزل؟
▪️قلت حتفتح مثلاً مصانع في أسبوع فتح ولا ما فتح؟
▪️قلت حتوصل مثلاً 50 تنكر موية للأبيض وصلوا ولا ما وصلوا؟
لو ما نفذ أقيلو في ميدان عام لو نفذ أديهو صلاحيات زيادة بس ( الإقالة ساي ) عشان نرضي فلان او عشان الشارع يروق والميديا تحس بتغيير وتسكت دي سواقة بالخلا وما فيها انتصار خالص الإقالات دي تخدير موضعي بس بسكن الألم موقتاً …
◾️الخلاصة المُرة:
الحكومة هسي وضعها قريب لفريق كورة مهزوم 5 صفر تغيير المدرب في الدقيقة 90 ما بجيب قون لازم تغير خطة اللعب كلها وتنزل لعيبة عندهم لياقة وتديهم تعليمات واضحة لان الشوط الجاي دا بصراحة شوط مٌدربين ولو طلعت خسران بعد دا تشوف درب يمرقك بس فرصك انتهت يا !!
لذلك أنا بقول حالياً ( القبة تحتها مافي فكي )
لأنو الفكي الحقيقي هو كالآتي:
سياسات واضحة + قروش للتنفيذ + مسؤول على الارض صاحب قرار وكلمة يكرب قاشه ويتابع قرارته ويبعد من الجوكية واصحاب الكوميشن …
▪️غير كدا لو جبت مئة مسؤول حيفشلوا برضو….
وبس
